കെ എം ബഷീറിന്റെ മരണം: ശ്രീറാം വെങ്കിട്ടരാമന് കോടതിയുടെ അന്ത്യശാസനം
തിരുവനന്തപുരം: മാധ്യമ പ്രവര്ത്തകന് കെ എം. ബഷീറിനെ വാഹനമിടിച്ച് കൊലപ്പെടുത്തിയ കേസില് ഒന്നാം പ്രതിയും ഐ എ എസ് ഉദ്യോഗസ്ഥനുമായ ശ്രീറാം വെങ്കിട്ടരാമന്ന് കോടതിയുടെ അന്ത്യശാസനം. മൂന്ന് തവണ നോട്ടീസ് നല്കിയിട്ടും കോടതിയില് ഹാജരാകാത്ത ശ്രീറാം വെങ്കിട്ടരാമന്റെ നടപടിക്കെതിരെയാണ് കോടതിയുടെ താക്കീത്. അടുത്ത മാസം 12ന് കോടതിയില് നേരിട്ട് ഹാജരാകണമൊണ് തിരുവനന്തപുരം ഫസ്റ്റ് ക്ലാസ് മജിസ്ട്രേറ്റ് കോടതി (മൂന്ന്) അന്ത്യശാസനം നല്കിയത്.
കേസ് വിചാരണക്കായി സെഷന്സ് കോടതിയിലേക്ക് കമ്മിറ്റ് ചെയ്യുന്നതിലേക്കായുള്ള ക്രിമിനല് നടപടി ക്രമത്തിലെ വകുപ്പ് 209 പ്രകാരമാണ് കോടതി പ്രതികളോട് നേരിട്ട് ഹാജരാകാന് ആവശ്യപ്പെട്ടത്. എന്നാല്, വിവിധ കാരണങ്ങള് പറഞ്ഞാണ് ശ്രീറാം കോടതിയില് ഹാജരാകാതെ മാറിനില്ക്കുന്നത്.
2020 ഫെബ്രുവരി മാസം 3 ന് പ്രത്യേക അന്വേഷണ സംഘം സമര്പ്പിച്ച കുറ്റപത്രം കോടതി അംഗീകരിച്ചിരുന്നു. പിന്നാലെയാണ് ഒന്നും രണ്ടും പ്രതികളെ കോടതിയില് ഹാജരാക്കാന് കോടതി പ്രത്യേക അന്വേഷണ സംഘത്തോടാണ് ഉത്തരവിട്ടത്. കുറ്റപത്രവും അനുബന്ധ രേഖകളായ സാക്ഷിമൊഴികള് , മെഡിക്കല് പരിശോധന റിപ്പോര്ട്ട് , ഫോറന്സിക് റിപ്പോര്ട്ടുകള് എന്നിവയുടെ പരിശോധനയില് നരഹത്യ കുറ്റത്തിന്റെ വകുപ്പായ 304 (ii) ശ്രീറാമിനെ പ്രഥമദൃഷ്ട്യാ നില നില്ക്കുന്നുവെന്ന് കോടതി നിരീക്ഷിച്ചു. പത്തു വര്ഷം വരെ തടവും പിഴയും ശിക്ഷിക്കാവുന്ന സെഷന്സ് കുറ്റമായതിനാല് സെഷന്സ് കോടതി വിചാരണ ചേയ്യേണ്ടതായ 304 (ii) നിലനില്ക്കുന്നതായി കണ്ടെത്തിയതിനാല് കേസ് കമ്മിറ്റ് ചെയ്ത് വിചാരണക്കായി സെഷന്സ് കോടതിക്കയക്കും മുമ്ബ് പ്രതികള് കോടതിയില് ഹാജരായി മുന് ജാമ്യ ബോണ്ട് പുതുക്കി ജാമ്യം നില നിര്ത്തേണ്ടതുണ്ട്. അതിന്റെ ഭാഗമായാണ് കോടതി പ്രതികളെ വിളിച്ചു വരുത്തുന്നത്.
