ജോലിക്കെത്താത്ത ജീവനക്കാര് വേണ്ട; 430 ഡോക്ടര്മാരുള്പ്പെടെയുള്ള 480 ജീവനക്കാരെ സര്വീസില് പിരിച്ചുവിടുമെന്ന് മന്ത്രി കെ.കെ. ശൈലജ
അനധികൃതമായി സര്വീസില് നിന്നും വിട്ടുനില്ക്കുന്ന ആരോഗ്യ വകുപ്പിന് കീഴിലുള്ള 430 ഡോക്ടര്മാരുള്പ്പെടെയുള്ള 480 ജീവനക്കാരെ സര്വീസില് നിന്നും നീക്കം ചെയ്യാന് സര്ക്കാര് തീരുമാനിച്ചതായി ആരോഗ്യ വകുപ്പ് മന്ത്രി കെ കെ ശൈലജ അറിയിച്ചു.
ദീര്ഘകാലമായി അവധിയില് കഴിയുന്നവര്ക്ക് തിരികെ ജോലിയില് പ്രവേശിക്കാന് നേരത്തെ രണ്ട് തവണ അവസരം നല്കിയിട്ടും സര്വീസില് പ്രവേശിക്കാനോ കൃത്യമായ കാരണം കാണിക്കാനോ തയ്യാറാകാത്തവര്ക്കെതിരേയാണ് സര്ക്കാറിന്റെ നടപടി. ഒരുവര്ഷത്തെ ഇടവേളയ്ക്കുള്ളില് രണ്ടു തവണ അവസരം നല്കിയിട്ടും സര്വീസില് പ്രവേശിക്കുന്നതിന് താത്പര്യം പ്രകടിപ്പിക്കാത്ത ജീവനക്കാരെ നീക്കം ചെയ്യുന്നതിനാണ് തീരുമാനമെടുത്തിരിക്കുന്നത്. അനധികൃതമായി ജോലിക്ക് ഹാജരാകാതിരുന്ന മെഡിക്കല് വിദ്യാഭ്യാസ വകുപ്പിലെ 36 ഡോക്ടര്മാരെ നേരത്തെ പുറത്താക്കിയിരുന്നുവെന്നും മന്ത്രി വ്യക്തമാക്കി.
സര്വീസില് നിന്നും വിട്ടുനില്ക്കുന്ന പ്രബേഷന് പൂര്ത്തിയാക്കിയ 53 ഡോക്ടര്മാരും പ്രൊബേഷനര്മാരായ 377 ഡോക്ടര്മാരും ഉള്പ്പെടെ 430 ഡോക്ടര്മാരേയാണ് നടപടിക്രമങ്ങള് പാലിച്ചുകൊണ്ട് പിരിച്ചുവിടുന്നത്. ഇതിന് പുറമേ അനധികൃതാവധിയിലായ ആറ് ഹെല്ത്ത് ഇന്സ്പെക്ടര്മാര്, നാല് ഫാര്മസിസ്റ്റുകള്, ഒരു ഫൈലേറിയ ഇന്സ്പെക്ടര്, 20 സ്റ്റാഫ് നഴ്സുമാര്, ഒരു നഴ്സിംഗ് അസിസ്റ്റന്റ്, മൂന്ന് ദന്തല് ഹൈനീജിസ്റ്റുമാര്, രണ്ട് ലാബ് ടെക്നീഷ്യന്മാര്, മൂന്ന് റേഡിയോഗ്രാഫര്മാര്, രണ്ട് ഒപ്റ്റോമെട്രിസ്റ്റ് ഗ്രേഡ്-രണ്ട്, രണ്ട് ആശുപത്രി അറ്റന്ഡര് ഗ്രേഡ്-രണ്ട്, മൂന്ന് റെക്കോഡ് ലൈബ്രേറിയന്മാര്, ഒരു പിഎച്ച്എന് ട്യൂട്ടര്മാര്, മൂന്ന് ക്ലാര്ക്കുമാര് എന്നിങ്ങനെ 50 ജീവനക്കാരേയുമാണ് പിരിച്ചുവിടുന്നത്.
