അവ്യക്തമായി മരുന്ന് കുറിപ്പടികള്‍ എഴുതുന്നത് ഡോക്ടര്‍മാര്‍ അവസാനിപ്പിക്കണമെന്ന് ആരോഗ്യമന്ത്രി
ഡോക്ടര്‍മാര്‍ അവ്യക്തമായി മരുന്ന് കുറിപ്പടികള്‍ എഴുതുന്നത് അവസാനിപ്പിക്കണമെന്ന് ആരോഗ്യമന്ത്രി കെ.കെ.ശൈലജ. കര്‍ശന നിര്‍ദ്ദേശം നല്‍കിയിട്ടും ചില ഡോക്ടര്‍മാര്‍ അവ്യക്തമായി മരുന്നുകുറിപ്പടികള്‍ എഴുതുന്നുണ്ടെന്നും അത് അവസാനിപ്പിക്കണമെന്നും ആരോഗ്യ മന്ത്രി നിര്‍ദ്ദേശം നല്‍കി .
ഇ ഹെല്‍ത്ത് പദ്ധതിയിലൂടെ പല സര്‍ക്കാര്‍ ആശുപത്രിയിലും മരുന്ന് കുറിപ്പടികള്‍ ഡിജിറ്റല്‍ ആക്കിയിട്ടുണ്ട്. ഈ പദ്ധതി എല്ലാ ആശുപത്രികളിലേക്കും വ്യാപിപ്പിക്കും. ഇതിനായി ഡോക്ടര്‍മാര്‍ക്ക് പ്രത്യേക ട്രെയിനിംഗ് നല്‍കുമെന്നും കെ കെ ശൈലജ പറഞ്ഞു.
മരുന്ന് കുറിപ്പടികള്‍ വ്യക്തമായി എഴുതണമെന്ന മെഡിക്കല്‍ കൗണ്‍സില്‍ നിര്‍ദ്ദേശം ആറ് വര്‍ഷം മുന്‍പുതന്നെ നിലവില്‍ വന്നിട്ടുണ്ട്. എന്നാല്‍ ഇപ്പോഴും ഡോക്ടര്‍മാര്‍ ഈ നിര്‍ദ്ദേശം പാലിക്കാറില്ല.
