വാട്സാപ്പിന് പകരം സായ്; ഇന്ത്യൻ സൈനികർക്കായി സുരക്ഷിത മെസേജിങ് ആപ്പ്, നീക്കം രഹസ്യങ്ങൾ ചോരാതിരിക്കാൻ
സൈനിക രഹസ്യങ്ങൾ ചോരാതിരിക്കാൻ വാട്സാപ്പിനു സമാനമായി സ്വന്തം മെസേജിങ് ആപ്പുമായി ഇന്ത്യൻ സൈന്യം. വോയ്സ്നോട്ട്, വീഡിയോ കോളിങ് ഉൾപ്പടെയുളള സേവനങ്ങൾ ഉറപ്പുവരുത്തുന്ന ആപ്പിന് സായ് (SAI) എന്നാണ് പേരുനൽകിയിരിക്കുന്നത്.
സെക്യുർ ആപ്ലിക്കേഷൻ ഫോർ ഇന്റർനെറ്റ് എന്നതിന്റെ ചുരുക്കരൂപമാണ് സായ്. സിഇആർടിയിൽ – എംപാനൽ ചെയ്തിട്ടുള്ള ഓഡിറ്ററും ആർമി സൈബർ ഗ്രൂപ്പും ഈ ആപ്ലിക്കേഷന് നിയമപരമായ അനുമതി നൽകിയതായി സൈന്യം അറിയിച്ചു.
വാട്സാപ്പ്, ടെലഗ്രാം, സംവാദ് തുടങ്ങിയ മെസേജിങ് ആപ്ലിക്കേഷനുകൾക്ക് സമാനമാണ് സായ്യുടെ പ്രവർത്തനരീതിയും. എന്നാൽ മൂന്നാമതൊരാൾക്ക് സന്ദേശങ്ങൾ കാണാനോ വായിക്കാനോ സാധിക്കില്ല.
വാട്സാപ്പിനു സമാനമായി എൻഡ് ടു എൻഡ് എൻക്രിപ്ഷൻ ഈ ആപ്പിലും ഏർപ്പെടുത്തിയിട്ടുണ്ട്. പ്രതിരോധ മന്ത്രി രാജ്നാഥ് സിങ് ആപ്ലിക്കേഷൻ പരിശോധിക്കുകയും ഇതു വികസിപ്പിക്കുന്നതിനു പിന്നിൽ പ്രവർത്തിച്ച കേണൽ സായ് ശങ്കറെ അഭിനന്ദിക്കുകയും ചെയ്തു.
സിഇആർടി, ആർമി സൈബർ ഗ്രൂപ്പും ആപ്പ് സൂക്ഷ പരിശോധനയ്ക്ക് വിധേയമാക്കിയിരുന്നതായി ഇന്ത്യൻ സൈന്യത്തിന്റെ പ്രസ്താവനയിൽ പറയുന്നു.
